mwanawaligangablog: Juni 2018

Jumatatu, 11 Juni 2018

Deni La Taifa Kufanyiwa Uhakiki Mwakani

Naibu Waziri wa Fedha na Mipango, Dk. Ashatu Kijaji amesema mwaka ujao wa fedha, Tanzania itafanyiwa tathimini kuhusu deni la taifa.

Dk. Kijaji ametoa kauli hiyo bungeni leo wakati akijibu swali la Mbunge wa Mtambile, Masoud Abdalah Salim (CUF) ambaye alihoji ni lini deni la taifa litafanyiwa uhakiki ili kuwe na hali nzuri ya uchumi.

“Mnaendelea kukopa na deni halifanyiwi uhakiki ni lini sasa mtafanya mkakati huu wa uhakiki kwa haraka,”amehoji.

Akijibu swali hilo, Dk. Kijaji amesema Serikali haijawahi kuacha kulipa deni hata mwezi mmoja ndiyo maana Tanzania bado inaaminiwa.

“Mikopo yote tunayokopa tunapeleka kwenye maendeleo ya kiuchumi na bado tunasisitiza kuwa deni letu ni himilivu.

“Kuhusu uhakiki wa deni letu katika mwaka ujao wa fedha itafanyiwa tathimini,”amesema.

Naye Mbunge wa Viti Maalumu, Sophia Mwakagenda amehoji ni lini Serikali italeta sheria bungeni ya mikopo ili inapokopa wabunge wafahamu.

Akijibu hilo, Dk. Kijaji amesema: ” Serikali tunapokopa tunafuata sheria na katiba na imeendelea kusimamia deni la taifa kwa kuzingatia sheria ya mikopo,”.

Spika Ndugai Akerwa na Gawio Kiduchu la Benki ya NBC Kwa Serikali

Sika wa Bunge, Job Ndugai, ameitaka Benki ya Taifa ya Biashara (NBC) kutoa maelezo kwa Kamati ya Kudumu ya Bunge ya Uwekezaji na Mitaji (PIC) kuhusu kiasi kidogo cha gawio wanachokitoa kwa Serikali. Kwa mwaka 2016-2017 ilitoa Sh bilioni 1.2.

Kauli hiyo aliitoa mjini hapa jana wakati akifungua semina kwa wajumbe wa PIC na baadhi ya wajumbe wa kamati nyingine ikiwamo bajeti, uongozi wa NBC na Ofisi ya Msajili wa Hazina.

Pamoja na mambo mengine, Ndugai alisema kwa hisa ya asilimia 30 ambazo Serikali inazo kwa benki hiyo, gawio hilo ni kidogo sana na linatia shaka.

“Hisa zenu hazitofautiani sana na za Serikali zilizopo Benki ya NMB, lakini wenzenu wamekuwa wakitoa gawio kubwa kuliko ninyi, hapa mna kazi kubwa ya kuishawishi kamati ili iweze kukubaliana na majibu yenu juu ya kiasi hicho cha gawio.

“Inadhihirisha wazi kwamba hakuna urafiki na wananchi kutokana na kutokuwa karibu nao kwa kushindwa kufungua matawi wala kutoa mikopo kwa wananchi kama zinavyofanya NMB na CRDB,” alisema.

Aliutaka uongozi huo wa NBC kulitafakari hilo na kulifanyia kazi ili benki hiyo iwe karibu na wananchi.

“PIC imepewa jukumu la kuangalia mashirika yote na kuona utendaji kazi wao kwa sababu kuna takribani mashirika 272 ambayo ni muhimu na itasaidia Serikali kujua nini kinaendelea kabla ya kuingia mikataba na kuondoa malalamiko ambayo yamekuwepo,” alisema.

Awali, Mwenyekiti wa Kamati ya PIC, Raphael Chegeni, aliitaka NBC kuacha kulala na kuanza kufanya kazi kwa ufanisi na Serikali.

Kuhusu agizo hilo la Spika, Chegeni alimwomba kwa kuwa Bunge linaendelea, awape nafasi ili wakutane na taasisi hizo.

Kwa upande wake, Kaimu Mkurugenzi wa NBC, Theobald Sabi, alisema watapata nafasi ya kuzungumza na kamati kuwaeleza juu ya mwenendo wa benki, mafanikio na changamoto mbalimbali ambazo inazipitia.

Kuhusu gawio, alisema hivi sasa wanasonga mbele wakiendelea kuikuza benki hiyo na mwaka 2000 ilikuwa na jumla ya mtaji wa Sh bilioni 326, lakini sasa mtaji ni Sh trilioni moja.

Alisema hayo ni mafanikio na watajitahidi kusonga mbele na mwaka 2017 walilipa gawio kwa Serikali Sh bilioni 1.2 na wanategemea wamiliki wa benki watafanya uamuzi juu ya ulipaji wa gawio miaka ijayo.

BAWACHA Wamtaka Mwigulu Nchemba Ajiuzulu

Baraza la Wanawake la Chadema (Bawacha) limelaani vikali kitendo cha udhalilishaji kilichofanywa na Jeshi la Polisi dhidi ya Amina Mapunda aliyejifungua kituo cha polisi bila msaada wowote baada ya kuwekwa mahabusu kwa muda mrefu ilhali akiwa mjamzito.

Vilevile, baraza hilo limemtaka Waziri wa Mambo ya Ndani ya Nchi, Dk. Mwigulu Nchemba kujiuzulu nafasi yake kutokana na mfululizo wa matukio ya polisi kunyanyasa wananchi.

Mbali na Mwigulu, Bawacha imetaka pia naibu wa Mwigulu, Hamad Yussuf Masauni na Mkuu wa Jeshi la Polisi (IGP), Simon Sirro kuachia nafasi zao pia.

Amina (26), mkazi wa Kiswanya, Kijiji cha Mgundeni, Tarafa ya Mang'ula wilayani Kilombero mkoani Morogoro, alijifungua nje ya kituo cha polisi Mang'ula muda mfupi baada ya kutolewa mahabusu baada ya kulalama kwa muda mrefu kuumwa uchungu wiki iliyopita.

Kwa mujibu wa Naibu Waziri wa Mambo ya Ndani ya Nchi Masauni, mama huyo alikamatwa na polisi kutokana na tuhuma za mumewe kuuziwa vitu vya wizi vilivyokutwa ndani ya nyumba yao.

Wakati serikali ikiendelea na uchunguzi dhidi ya askari waliohusika na mkasa huo, uongozi wa Bawacha umesema kitendo cha mwanamke huyo kujifungulia nje ya kituo cha polisi bila msaada wowote "ni cha kinyama" na kinatoa picha mbaya kwa Jeshi la Polisi kwamba linafanya kazi yake bila kuzingatia weledi.

Akizungumza na waandishi wa habari jijini hapa jana, Katibu Mkuu wa Bawacha Taifa, Grace Tendega, alisema baraza hilo linalaani kitendo hicho na viongozi ndani ya Jeshi la Polisi wanatakiwa kujipima na kujitafakari kama kweli wanatosha.

Alisema kitendo cha jeshi hilo kusababisha mwanamke huyo kujifungua kwenye mchanga hakimdhalilishi yeye peke yake, bali kinawadhalilisha kina mama wengi wa Kitanzania na ni ukiukwaji wa haki za binadamu.

"Hapa unaweza kujiuliza mama anahusikaje na wizi wa mume wake? Hata kama kweli waliona kuna vifaa vya wizi, kwanini hawakuchukua vifaa hivyo kama ushahidi?" Alihoji.

Mbunge wa Viti Maalum (Chadema) pia, Tendega alisema zaidi: "Lakini inashangaza hao polisi hawakuona kama huyo mama ni mjamzito au hawajui mtu ambaye ni mjamzito? Haya ni mambo ya ajabu sana kwa Jeshi la Polisi."

Alisema kitendo hicho ni kibaya na kuna kila sababu ya viongozi wa Jeshi la Polisi kuanzia ngazi ya Mkuu wa Polisi Wilaya ya Kilombero, Mkuu wa Polisi Mkoa wa Morogoro, Mkuu wa Jeshi la Polisi Taifa (IGP) pamoja na Waziri wa Mambo ya Ndani ya Nchi na naibu wake kujitafakari na kujipima kama kweli wanastahili kuendelea na kazi.

Alisema matukio ya aina hiyo yamekuwa yakijirudia mara kwa mara na Jeshi la Polisi limekuwa likikaa bila kuonyesha juhudi yoyote ya kuwachukulia hatua wanaohusika na ukiukwaji huo wa haki za binadamu kwa kuwatesa wananchi au kuwafanyia vitendo vya unyanyasaji.

Tendega alisema pamoja na kuwapo kwa vitisho mbalimbali, Chadema na Bawacha hawatanyamaza na badala yake watapaza sauti kwa ajili ya kuwatetea wanyonge na kudai haki bila kuwa na uoga.

Pacha wa Bukoba kutenganishwa Saudi Arabia

Serikali ya Saudi Arabia imesema itagharamia matibabu nchini humo kutenganisha pacha walioungana, Anisia na Almesia, wenye umri wa miezi mitano, yatakayofanyika nchini Saudi Arabia.

Watoto hao walizaliwa Januari 29, wilayani Misenyi katika Kituo cha Masista cha St. Theresa Omukajunguti Kata ya Kyaka na kufikishwa Hospitali ya Taifa Muhimbili jijini Dar es Salaam mapema mwezi Februari, ambako wamewekwa kwenye wodi maalumu ya jengo la watoto ya Magufuli, wakipatiwa matibabu ya awali kabla ya kupelekwa Saudia Arabia kwa matibabu.

Watoto hao wa Jonisia wameungana eneo kubwa la kifua na tumbo, lakini kila mmoja ana mfumo wake wa hewa.

Naibu Balozi wa Saudi Arabia nchini Tanzania, Bandar Abdullah Al – Hazani amesema kuwa watoto hao watafanyiwa upasuaji huo wa kuwatenganisha katika Hospitali ya Mfalme Abdulaziz Medical iliyopo Riyadh, mji mkuu wa Saudi Arabia, ambako kuna madaktari bingwa wa upasuaji.

Alisema mpango huo wa kufanikisha matibabu ya upasuaji wa kuwatenganisha mapacha hao, unafanywa kwa ushirikiano wa ubalozi wa Saudi Arabia nchini chini ya balozi wake Mohamed Bin Mansour, uongozi wa Hospitali ya Muhimbili na Waziri wa Mambo ya Nje, Dk Augustine Mahiga.

“Mara tu mipango na maandalizi itakapokamilika, tunatarajia watoto kuondoka kwenda Riyadh mwishoni mwa mwezi huu," alisema Al-Hazani.

Hospitali ya Mfalme Abdulaziz Medical huko Riyadh, ina uwezo mkubwa ikiwa na vifaa vya kisasa na vitanda 1,501 na ilianza shughuli zake Mei 1983.

Tangu wakati huo, imeendelea kupanuka, huku ikitoa huduma kwa idadi ya wagonjwa wanaokua kwa kasi katika maeneo yote.

Mama wa pacha hao, Jonisia Jovitus (21) alisema tayari watoto wake wamechukuliwa vipimo mbalimbali na jopo la madaktari wa Hospitali ya Muhimbili na kuvituma Saudi Arabia.

"Madaktari wameniambia walishatuma vipimo Saudi Arabia na uwezekano wa watoto wangu kutenganishwa upo, naomba Mungu asaidie hili lifanikiwe… ila walichoniambia ni kuwa wanangu wakifanikiwa kutenganishwa salama watakuwa walemavu, mmoja atakuwa na mguu mmoja na mwingine ana miguu miwili, lakini huo mmoja hauna nguvu umepooza. Ninachoomba kwa sasa ni kuwaona watoto wangu wametenganishwa na kuwa salama, naomba jamii iniombee ili lifanikiwe.”- Jonisia

Uongozi wa Hospitali wa Muhimbili kupitia kwa Ofisa Uhusiano, Aminiel Eligaesha ulisema kuwa utaweka wazi kuhusu mchakato mzima wa watoto hao madaktari watakapokuwa tayari.

Awali, uongozi huo wa Muhimbili ulikuwa uzungumze na vyombo vya habari juzi, lakini waliahirisha kwa kile kilichoelezwa kuwa wahusika wamepata dharura, hivyo vyombo vya habari vitaarifiwa siku itakayoitishwa upya mkutano huo.

Credit: Habarileo

Habari Zilizopo Katika Magazeti ya Leo Jumatatu ya June 11

GOR MAHIA WAZIMA NDOTO ZA SIMBA KUCHEZA NA EVERTON, WATWAA UBINGWA SUPER CUP

Mechi ya fainali ya SportPesa Super Cup imemalizika kwa mabingwa wa Ligi Kuu nchini Kenya kuibuka na ushindi wa mabao 2-0.

Katika mechi hiyo iliyochezwa kwenye Uwanja wa Afraha mjini Nakuru, Gor Mahia walitawala zaidi mchezo wakiwa na kikosi chao kamili huku Simba wakipata wakati mgumu kutengeneza nafasi za kufunga.

Gor Mahia wamejipatia mabao yao kupitia kwa Mshambuliaji wao hatari, Medy Kagere aliyefunga la kwanza katika dakika ya 6 tu ya mchezo na kufanya kipindi cha kwanza kiende kwa bao 1-0.

Kipindi cha pili kilianza tena kwa Gor Mahia kuzidi kulisakama lango la Simba wakionesha njaa ya kupata goli jingine ambapo mnamo dakika ya 54, Tuyisenga alifunga bao la pili kwa kumalizia mpira wa krosi uliopigwa kutoka kulia mwa Uwanja na kumuacha Kipa Aishi Manula akiwa hana cha kufanya.

Mpaka Mwamuzi wa mchezo anapuliza kipyenga cha kumaliza mchezo, Gor Mahia 2, Simba SC 0.

Ushindi huo unawafanya Gor Mahia kuwa mabingwa wa Kombe la SportPesa Super Cup kwa mara ya pili mfululizo na kujipatia tiketi ya safari kuelekea England kukipiga na Everton kwenye Uwanja wa Goodison Park.

Ikumbukwe mwaka jana Gor Mahia waliweza kutwaa ubingwa huo katika Uwanja wa Uhuru, Dar es Salaam baada ya kuwafunga wapinzani wao wa Kenya, AFC Leopards kwa jumla ya mabao 3-0.

Prince Harry na Meghan Markle watangaza ziara yao ya kwanza ya kifalme

Prince Harry na mkewe Meghan Markle (Duke and Duchess of Sussex), wametangaza ziara yao ya kwanza ya kifalme katika nchi nne duniani.

Kutokana na taarifa iliyotolewa na Ikulu ya Kensington, imetaja nchi hizo ni pamoja na Australia, Fiji, Tonga na New Zealand. Hiyo ni ziara ya kwanza kwa wawili hao tangu watoke (Honey Moon) fungate nchini Canada hivi karibuni.

The Duke and Duchess of Sussex will undertake an official visit to Australia, Fiji, the Kingdom of Tonga, and New Zealand in the Autumn. Their Royal Highnesses have been invited to visit the Realms of Australia and New Zealand by the countries’ respective governments. The Duke and Duchess will visit the Commonwealth countries of Fiji and Tonga at the request of the Foreign and Commonwealth Office

Prince Harry na Meghan Markle wantarajiwa kunza ziara hiyo Oktoba mwaka huu.

TUZO ZA MO KUFANYIKA JIONI YA LEO DAR ES SALAAM

Tuzo za Simba Mo Awards zinafanyika leo katika ukumbi wa Hotel ya Hyatt Regency jijini Dar es Salaam.

Tuzo hizo zitakuwa maalum kwa watu wa klabu hiyo waliofanikisha Simba kufanya vizuri kwa msimu wa 2017/18.

Wanachama, viongozi, mashabiki na matawi ya klabu hiyo yatahusishwa katika ugawajwi wa tuzo hizo zitazofanyika leo kuanzia saa 12 kamili jioni.

Kwa mujibu wa mwanzilishi ambaye ni mwekezaji mpya wa klabu hiyo, Mohammed Dewji 'Mo', amesema lengo mahususi la kuanzisha tuzo hizo ni kutambua mchango wa waliofanikisha Simba kufikia hapo ilipo.

Baadhi ya vipengele ambavyo vitakuwepo katika ugawajwi wa tuzo hizo ni mchezaji bora wa mwaka, kiungo, mshambuliaji, shabiki na zinginezo.

Ndani ya saa 48 Samatta atatengana na rafiki yake KRC Genk

Beki wa kimataifa wa Gambia anayecheza club ya KRC Genk ya Ubelgiji Omar Colley baada ya kuripotiwa kugoma kusaini mkataba mpya ndani ya club ya Genk na kushinikiza uhamisho wake wa kwenda kucheza soka Italia katika club ya Sampdoria iliyomaliza Ligi Kuu nafasi ya 10 msimu wa 2017/2018.

Colley na Samatta wakifurahia goli Europa League

June 10 2018 ameonekana akiwasili nchini Italia kwa ajili ya kufanya vipimo vya afya na kukamilisha usajili wake katika club ya Sampdoria ya Ligi Kuu Italia Serie A, Colley ambaye amekuwa akiunda safu nzuri ya ulinzi ya Genk inadaiwa uhamisho wake wa kujiunga na Sampdoria utakamilika ndani ya saa 48 kutokea sasa.

Omar Colley na Samatta wakishangilia goli kwa kuabudu kwa imani yao ya dini ya kiislam

Colley atauzwa kwa kiasi kinachoanzia euro milioni 6-8 kutoka Genk kwenda Sampdoria, Genk wanahitaji euro milioni 8 wakati Sampdoria wakifikia euro milioni 6, kama utakuwa unakumbuka vizuri Omar Colley na Mbwana Samatta ambao wamekuwa wakicheza Genk pamoja kwa miaka miwili sasa, wamekuwa na uhusiano mzuri, kiasi cha kuonekana sehemu mbalimbali wakiwa pamoja.

Omar Colley

Hata hivyo Omar Colley ambaye ana mkataba na Genk wenye kipengele cha kuongeza miaka miwili zaidi, ameonesha dhamira ya dhati ya kuhitaji kwenda kutafuta changamoto sehemu nyingine, ripoti zaidi zinaeleza kuwa Genk na Sampdoria wamefikia makubaliano na kutaka kuwekwa kipengeleza cha kufaidika kwa asilimia flani kwa mauzo ya Omar Colley kama akiuzwa kutoka Sampdoria kwenda timu nyingine.

Mbwana Samatta na Omar Colley wakiwa Macca Saudi Arabia

Omar Colley ni room mate wa Mbwana Samatta kitu ambacho kimewafanya wawe karibu kwa kiasi kikubwa, Samatta na Colley hivi karibuni pia walionekana Macca Saudi Arabia wakiwa pamoja katika ibada ya umrah, fahamu kuwa sio Sampdoria pekee walionesha nia ya kumuhitaji Colley bali hata vilabu vya Everton, Hull Cit, Monaco na Hamburg ambavyo na vyenyewe vilikuwa vikihitaji huduma ya Colley.

Msimamo wa Serie A ilivyomaliza Sampdoria

Simba warejea nchini Usiku

Kikosi cha Simba kimerejea nchini usiku wa jana kikitoea, Nakuru, Kenya ambako kilienda kushiriki mashindano ya SportPesa Super CUP.

Kikosi hicho kimerudi ikiwa ni baada ya kupoteza mchezo wa fainali kw ajumla ya mabao 2-0 dhidi ya Gor Mahia uliopigwa jana kwenye Uwanja wa Afraha.

Kwa mujibu wa Ofisa wa Habari wa Simba, Haji Manara, amesema wamewahi kurejea kwa ajili ya halfa maalum ya uhawajwi wa tuzo za wachezaji wao unaofanyika leo kwenye Hotel ya Hyatt Regency Hotel jijini Dar es Salaam.

Tuzo hizo zinazojulikana kama Mo Simba Awards, zitatolewa kwa viongozi, wachezaji, tawi na shabiki bora kwa msimu wa 2017/18.

Kwa mujibu wa mwanzilishi wa tuzo hizo, Mohammed Dewji 'Mo. amesema lengo kubwa la kuazishwa kwa tuzo hizo ni kutambua mchango wa walofanikisha kupata mafanikio makubwa ndani ya klabu ikiwemo ubingwa wa ligi kwa msimu uliomalizika.

Saa 24 zimesalia Trump na Kim kukaa meza moja

Leo June 11, 2018 Mkutano wa kihistoria wa viongozi wa mataifa hasimu kwa muda mrefu Marekani na Korea Kaskazini ambao awali uliahirishwa sasa unaashiria kufanyika nchini Singapore kesho Jumanne katika kisiwa cha Sentosa baada ya viongozi hao kuwasili nchini humo kwa nyakati tofauti.
Kiongozi wa Korea Kaskazini, Kim Jong Un ndiye aliyeanza kuwasili Singapore na kisha Rais wa Marekani, Donald Trump naye akafuatia.
Marekani na Korea Kaskazini ni mataifa yanayokinzana tangu vita vya Korea vya mwaka 1950 hadi mwaka 1953 na viongozi wa nchi hizo hawajawahi kukutana wala kuzungumza kwa njia ya simu na mkutano huu wa Trump na Kim unatarajiwa kumaliza uhasama wa mataifa hayo kuhusiana na silaha za nyuklia za Korea Kaskazini suala ambalo lingeweza kuwaingiza kwenye vita.