Siku ya Mazingira Duniani: AAR wapanda miti na kutoa elimu kwa wanafunzi juu ya kutunza mazingira

Leo ni siku ya Mazingira Duniani, ambapo Kampuni ya bima ya afya nchini ya AAR imepanda miti katika shule ya msingi ya Ushindi iliyopo eneo la Mikocheni jijini Dar es salaam ikiwa ni hatua ya kuunga mkono kwa vitendo utunzaji mazingira.

Wafanyakazi wa kampuni ya AAR wakiwa na wanafunzi hao
AAR imefanya zoezi hilo Jumanne hii ikipanda jumla ya miti 60 katika shule hiyo ya Umma iliyo kwenye eneo lililo karibu na ofisi za makao makuu ya kampuni hiyo, katika kuadhimisha siku ya mazingira.
Akiongea baada ya zoezi hilo la upandaji miti, Msemaji wa AAR Bi.Hamida Rashid amesema kuwa kuboresha na kulinda afya ya jamii ni sehemu muhimu ya jukumu la kampuni hiyo, hivyo haina budi kusaidia na kuhamasisha kwa vitendo utunzaji wa mazingira katika jamii inayotuzunguka kwani ndio msingi wa uhai.
“Tunafahamu mazingira ni muhimu katika maisha yetu kwani ubora wa afya na uhai wetu unategemea hali ya mazingira yetu. Kama kampuni ya bima ya afya ambayo hujikita katika kuboresha na kulinda afya ya jamii, tunaamini kwamba ni jambo lisilowezekana kuwa na jamii yenye afya bora bila kuhakikisha kuwa jamii inaishi kwenye mazingira bora yanayohifadhiwa vizuri,” alisema Bi Rashid.
Aliongeza,”Ndio sababu tumeamua kuihakikisha jamii kwa vitendo kupanda miti, Tunaamini elimu ya mazingira ikitokea vizuri kwa jamii kuanzia kwa watoto shuleni tutajenga taifa la wachapakazi ambalo ni rafiki wa mazingira,”
Aidha, Bi.Rashid alitoa wito kwa makampuni mengine pamoja na watu binafsi kuunga mkono juhudi za serikali kulinda mazingira ili kuhuisha ukuaji wa taifa lenye watu wenye afya bora. Pia aliwataka walimu kushirikiana na wazazi kuhakikisha wanafunzi wanapata elimu ya mazingira kwa vitendo.
Naye Mwalimu Mkuu wa Shule ya Msingi Ushindi, Mwalimu Elias Katunzi aliwashukuru AAR kwa kujitolea kuboresha mazingira ya shule hiyo na kuahidi kuendelea kuwafundisha wanafunzi kuwa marafiki wa mazingira.