Mchezaji wa Fiorentina afia hotelini, Ligi kuu soka Italia yasimamishwa

Nahodha wa klabu ya Fiorentina na mchezaji wa timu ya taifa ya Italia, David Astori amefariki dunia usiku wa kumamkia leo huko mjini Udine nchini Italia akiwa hotelini akisubiri mchezo wa leo dhidi ya klabu ya Udinese.

Gazeti la Udine Today mapema leo asubuhi Jumapili Machi 4, 2018 limesema mchezaji huyo alishindwa kuamka hadi saa tatu na ndipo wahudumu walipolazimika kufungua mlango kwa nguvu na kumkuta akiwa tayari ameshafariki.
Mtandao wa klabu ya Fiorentina nao umeandika taarifa iliyosomeka “Tunasikitika kutangaza kwamba nahodha David Astori amefariki, kwa hali hii ya kutisha na ya kushangaza, na juu ya yote kutokana na heshima kwa familia yake tunaomba utulivu kwaajili ya taarifa zaidi’,”.
Hata hivyo, bado hakuna taarifa rasmi juu ya kifo hicho kutoka kwa jeshi la polisi.
Kufuatia msiba huo,Shirikisho la Soka nchini Italia (IFF) limetangaza kusogeza mbele mechi 7 za leo ambazo nyingine zilitarajiwa kupigwa mchana huu.
David Astori (31) alijiunga na Fiorentina mwaka 2015 akitokea Cagliari ambapo awali  alimpelekwa kwa mkopo AS Roma na kisha kununuliwa moja kwa moja na Fiorentina, ambapo hadi mauti yanamkuta alikuwa ameshacheza mechi 90 na kutupia magoli matatu.